raud båt, raudt båthus

Det fine med å stå så høgt og fritt som på Osterøybrua, er at ein både kan få den store oversikta og dei små detaljane.

Sykkeltur til Bruvik

Å sykla til Bruvik på Osterøy er ei flott oppleving. Flate vegar, lite trafikk og fin natur gjer dette til ei rute som passar dei fleste. Me starta på Trengereid, noko som gav ein tur på fire mil tur/retur. Utsikta frå Osterøybrua er fantastisk.

Herfindalen

Herfindalen ligg 6 km frå Vaksdal sentrum. Ein smal og svingete veg fører opp til dei nedlagde bruka. Der vegen sluttar, er det fine stiar innover mot flotte fjellområde. Har sans for løa på eine biletet. Ei fin blanding av gamle murar og nyare bølgjeblekk.

Matprat

Endeleg sommar og sol! Då er det berre å fyra opp grillen og ta fantasien til hjelp. I kveld vart det grilla laks med dill, pakka inn i folie. Iskald rosevin er eit passande følgje. Legg merke til dei lange skuggane. Sola er i ferd med å seia takk for i dag.

Blågrå sommar

Greitt nok at regntunge sommarkveldar kan gje fine blåtonar, men eg er litt lei av dette. Eg er sikker på at 20 grader og kveldssol også kunne gitt mange fine fotomotiv!! Men slik er det ikkje.

Miss you

Etter å ha vore besteforeldre på heiltid ei veke, er det gått to dagar, og me lengtar alt veldig etter Casper og Nora.

Baltus kviler

Etter å hatt Baltus på besøk ei veke, har han avslørt enkelte vanar. Når nokon er ute eller bortreist, har han funne seg ein vaktposisjon i stovevindauga. Då kan han styrta ut straks den bortkomne viser seg. Når alle er inne og han har kontroll, kan han slappa av. I sofaen, sjølvsagt

Solbjørg

Dette er ikkje berre eit kvinnenamn, men også eit gardsnamn. Viss ein køyrer Bergsdalen og stoppar ved ferista midt mellom Lid og Berge, kan ein følgja ein traktorveg oppover lia. Høgt over dalen ligg denne fråflytta plassen. Her er to hus som er bygd saman, og det er mange fine murar etter andre gardshus. Frå Solbjørg kan ein gå gjennom skogen til Berge.

Reprise (nesten)

Same motivet, same utsikta, same veret, men det er litt seinare på kvelden, ca 22.45. I går var bileta tekne om lag kl 21.30.

Sommaren 2010

Desse skyene seier vel eigentleg alt om sommaren så langt. Regnskyer med blå himmel og sol i bakgrunnen. Vekslande ver, ikkje heilt bra, ikkje heilt dårleg.

Ny utsikt

Då kommunen fann ut at bakketoppen på Rongen skal vekk, førte det til at ein del skog måtte hoggast ned. Det førte igjen til at me fekk betre utsikt til elva. Dette er vel det ein kallar ein vinn vinn situasjon.

Øvstedalsvegen

Vegen til Øvstedalen er truleg den dårlegaste i Voss kommune. Sjekk for eksempel avstanden frå den opne bildøra og ned til vegbana. Honda Accord har ikkje spesielt stor bakkeklaring i utgangspunktet! Trassar ein vegen og kjem fram til Øvstedalen, ser ein at det er ei særs fin grend. I tillegg er det eit eit flott utgangspunkt for fjellturar, f. eks til Stordalen som er vist fleire stadar på denne bloggen,

Voss

Vossevangen sett frå ein ny vinkel, i alle fall for meg. Dette er sett frå vestsida av Bordalen, på vegen mot Rio. 8 (for dei som ikkje er lokalkjente: Rio her har trykk på i, ikkje på r som i Rio de Janairo)

Bordalsgjelet

Parker ved brua ved Vanngjolo og følg stien, eller ved Gjernes skule og følg skogsvegen. Då kjem du til botnen av Bordalsgjelet. Det er eit imponerande flott naturfenomen, og det er lagt godt til rette for fotografar og andre interesserte.

PC utan skjerm?

Eg hugsar enno første gongen eg fekk prøva skrivemaskina til bestefaren min. Det var utruleg spanande. Så kom den elektriske skrivemaskina før alle vart hekta på data. Ingen let seg lenger imponera av ein ny pc. Men viss ein derimot finn fram ei gammal, elektrisk skrivemaskin, vert skrivegleda stor. Rart å tenkja på at denne karen er oppvaksen med pc, men ikkje har prøvd skrivemaskin tidlegare.

Kveldstur

Halvmørkt, regn i lufta, kort sagt ein under middels julikveld,men det går an å få brukbare bilete likevel.

Vestlandet i regn

Av og til er veret så surt at ein kvir seg for å gå ut av bilen. Kva gjer ein då? tek bilete ut gjennom frontruta sjølvsagt. Motivet er forresten Bøyabreen i Fjærland.

Sunnmøre

På bloggen er det etter kvart ein del bilete av fjell og fjellområde i Voss. For å gjera det klart at eg innser at det også er fine fjell andre stadar i landet, kjem det her fjellbilete frå Sunnmøre. Desse alpine toppane er fantastiske.

Vervarsel

Eller rettare sagt verrepport, sidan desse bileta vart tekne tysdag. Det er på Sognefjorden, mellom Oppedal og Lavik. På eine biletet ser ein vestover der regnet er på veg inn. Når ein bevegar seg over på andre sida av ferja, er det vesentleg lettare ver. Men no er det sol!

Volda

Om ikkje akkurat Volda. så er det utsikt frå Volda. Klokka nærmar seg 23, og sola går ned, men ikkje før ho har farga dette fjellet raudt.