Eg vil inn att

Godt å vera ute i snøen, og freistande å gå inn att når ein veit det er fyr på peisen

Ettermiddag - Vassenden

Ikkje den store trafikken på E16, men nokon er ute. Kanskje har dei vore til Voss på ski?

Ettermiddag - Teigdalen

Klokka er 16.00. Ein kan ikkje sei at sola er i ferd med å gå ned, for i Teigdalen viser ikkje sola seg på denne tida av året. Likevel viser fargane på himmelen at me er i overgangen mellom dag og kveld.

Blue Christmas

20 kuldegrader gjer at det er lite freistande å vera ute lenge om gongen, men ein liten luftetur i den blå timen er likevel til å halda ut.

Sola har snudd!

Ok, det merkast ikkje enno, men med -18 på gradestokken er det godt å vita.

Jolestemning

Maten er klar til å setja på omnen, tunet er rydda for snø, golva vaska, det er tid for å nyta jolefreden.

Kvelden før kvelden

Ute snøar det tett, svært tett. Vegen fram til huset snøar att like fort som eg brøyter. No har eg gitt opp. I staden satsar me på at det skal vera stemning inne. Treet (trea) er pynta, bordet er klart til å ta mot gjester. Dette er julestemning på Horvei

Ventar på toget

Eg må innrømma at venting ikkje er mi sterkaste side. Då det vart fem minutt å venta på toget kl 22.18, vart det tid til å ta eit bilete av brua på Bolstad.

Juletreet på Bolstad.

Jadå, juletreet vart vist på bloggen om lag på same tid i fjor. Men det er så fint at det fortenar å verta vist fram kvart år. Det er største juletreet i Noreg, berre så det er sagt.

Styveshorgi

Dette er ein kveld med fullmåne, vakre stemningar og dermed fine fotomotiv. Problemet er at travle dagar og 20 minusgrader avgrensar fotoaktiviteten i stor grad. Men å stansa bilen og sjå at månen dukkar fram bak Styveshorgi går an.

Sild til jul

Sild i ulike variantar er eit viktig innslag på frukostbordet i jula. Kva er då betre enn å gå i lag med naboen og laga dobbelt så mange sortar på same tida. Resultatet av dugnaden vart sursild, ørtsild, einebærsild og akevittsild. Tomatsilda må venta til i morgon då me slapp opp for råvarer.

Peparkakelandsbyen

Bergen har sin pepperkakeby. Voss er litt mindre og derfor sin peparkakelandsby. Det er elevar i 9. klasse ved Voss ungdomsskule som har laga husa i landsbyen.

Eitt hus - fire sider

Når huset er pynta til advent og månen skin, då vert det julestemning midt oppi alt stresset.

Ventar på ferja

Kva gjer ein medan ein medan ein ventar at ferja skal dukka opp på Bruravik ein småsur desembermorgon? Ein kan f.eks ta fram kamera og stativ.

Utsikt

Var eigentleg på veg mot senga. Opdaga at det var skikkeleg stemningsfullt ute, dermed kom stativ og kamera fram. Dette var før regn og mildver sette inn.

Nysnø

Etter eit par veker med berrfrost, kom det endeleg litt snø. Ikkje mykje, men nok til at det vart kvitt.

Kaldt ute

- nesten like kaldt inne. Det er fint å sjå på glasruter med rimfrost, men det er ikkje fullt så fint å opphalda seg i rommet bak rutene. Heldigvis er det også rom i huset der det er isolerte veggar, trelags vindauge, varmepumpe og vedomn!

Utanom sesongen

Halsnøy og særleg området kring Halsnøy Kloster er for meg sommarplassen framfor nokon. Når veret er fint, viser dette seg også å vera ein nydeleg plass også på førvinteren, jamfør solnedgangbileta. Desse bileta er frå midt på dagen, og dei er tekne frå klosteret.

Sola går ned kl 15.30

Om lag kl halv fire seier sola takk for i dag. Dette er utløpet til Hardangerfjorden, ved Varaldsøy.